十一月，係我嘅生日月。

係吖，又大一歲啦… … 就嚟 （28號先真正又大一歲呀，俾我後生多幾日先啦）。

呢一年，變化真係好大好大。

你可以話，每年嘅變化都好多好大㗎啦，相戀變失戀，小六升中一，十條白頭髮增長至三十條。

但呢啲變化，我哋往往係被動嘅一個，從來無刻意求變，聽天由命，好嘅就感恩囉，壞嘅就逆來順受。

但係，呢一年，我主動咁去改變咗一啲多年嚟習以為常嘅嘢，我改變咗自己嘅性格。

本來，我過緊相對比較安穩嘅生活，性格亦偏向穩陣派。

一年前，我選擇咗過收入不穩定，大上大落嘅生活，而性格亦變得越嚟越情緒化同飄忽。

呢兩種性格，一定唔係咩好嘢嚟，但我反而過得好開心，好似寄居蟹終於搵到一個啱佢嘅殼咁。

情緒化、飄忽、惡死、硬頸、論盡、唔識煮飯做家務、唔易相處、自我中心、無理財觀念、需要大量私人空間、唔浪漫、無情趣等等等等等等。

換而言之，變成咗一個唔討好嘅女仔。

日復一日，我距離好女仔／好女友／好太太嘅一般社會大眾standard越嚟越遠，身邊嘅朋友終於開始為我要成為老姑婆而擔心。

女孩像我，點會有人要呢？但我又真係幾enjoy呢種生活，幾鍾意呢個自己，唔會改㗎啦。

雖然，有時都係會… … 唉。