Lady First o既主持人：

我有少少o野想問下各位… …

我o係同性當中算係一個好活潑同有幽默感o既女仔，自問各方面都ok ( 即樣貌、身高等 )，但係，一o係異性面前就會靜晒，因為總係驚住自己會講錯o野。

唔知係咪咁o既原故，我至今都未拍過拖。

(Q1) o係異性面前應該用d咩o既態度最好呢？例如溫柔d定成熟d好？ 用返自己平日o既待人態度最好。例如你明明係一個爽直男仔頭，勉強扮成小鳥依人，會唔會辛苦o左d呢？金馬影后都有拍完戲收工o既一日，唔通你可以24x7扮一世？

(Q2) 點樣做先可以有吸引力，吸引到異性？任何人望你，第一眼都係望到o個樣，外型靚咪吸引力多d囉。不過，老土都係咁話o架啦，內涵最重要。個殼靚極都有機會睇厭，inner beauty才是王道。

最近，我鍾意o左一個大我七、八年o既男仔，佢係我o既師兄，一次遇然下佢added o左我同我o既朋友A小姐。

我長期keep住online，但A小姐就唔係，我成日都會同師兄msn，佢間唔中就會問起A小姐o既事 ( 例如點解唔見A online )。

我知我唔及A小姐靚… … 但依然會扮無o野如實答佢… … 同埋我又有d覺得佢為o左解悶先會add我… …

(Q3) 佢係咪當我係小妹妹？我唔知，不過佢對你冇意思就係事實。

(Q4) 點做先可以o係佢眼中較A小姐更吸引？冇咩可能囉，先入為主，佢同一時間識你o地，睇中o左A小姐而唔係你，呢樣o野冇得改。

(Q5) o係佢面前應該用d咩o既態度/性格會成熟d？都係做返自己啦，反正，有分別咩？

(Q6) 其實我係咪應該放棄？係，absolutely。

仲有既o係，好多人話我同A個樣似姊妹，但我就係較遜色o個個，似陪襯品。

(Q7) 我知樣貌冇得變，但其他方面可以點樣取勝呢？你可以整容，整到靚過佢。又，如果你入得廚房出得廳堂上得大床仲好有錢，就贏到佢囉。只不過，當你真係有咁perfect o既時候，你仲會想要o個個small potato師兄？